2Sa 8 | NdeIBE | STEP | Ngokuqhubeka kwesikhathi uDavida wawehlula amaFilisti wawanqoba, wathumba iMethegi Ama ezandleni zamaFilisti.

2 Samuel 8

Ukunqoba kukaDavida

1 Ngokuqhubeka kwesikhathi uDavida wawehlula amaFilisti wawanqoba, wathumba iMethegi Ama ezandleni zamaFilisti.

2 UDavida wehlula amaMowabi futhi. Wawalalisa phansi emhlabathini wawalinganisa ngobude bentambo. Zonke izilinganiso ezimbili zawo zabulawa, kwathi isilinganiso sesithathu sayekelwa siphila. Ngakho amaMowabi abuswa nguDavida athela imithelo kuye.

3 UDavida wabuye walwa loHadadezeri indodana kaRehobi, inkosi yaseZobha, lapho aya khona ukuyavuselela umbuso wakhe ngaseMfuleni iYufrathe. 4 UDavida wathumba izinqola zikaHadadezeri zempi eziyinkulungwane, labatshayeli bazo abayizinkulungwane eziyisikhombisa, lezinkulungwane ezingamatshumi amabili zamabutho ezinyawo. Waquma imisipha yamabhiza wonke adonsa izinqola ngaphandle kwalikhulu.

5 Kwathi ama-Aramu aseDamaseko efika ukuba asize uHadadezeri inkosi yaseZobha, uDavida wabulala ayizinkulungwane ezingamatshumi amabili lambili zawo. 6 Wabeka izinkamba zamabutho okulinda elizweni lama-Aramu eDamaseko, kwathi ama-Aramu aba ngaphansi kombuso wakhe aletha imithelo. UJehova wamnika ukunqoba uDavida loba kungaphi lapho aya khona.

7 UDavida wathatha amahawu egolide ezikhulu zikaHadadezeri wawasa eJerusalema.

8 ETheba kanye laseBherothayi, imizi eyayingekaHadadezeri, inkosi uDavida yathatha khona ithusi elinengi kakhulu.

9 Kwathi uTowu inkosi yaseHamathi esizwa ukuthi uDavida wayelehlule lonke ibutho likaHadadezeri, 10 wathuma indodana yakhe uJoramu enkosini uDavida ukuyambingelela lokuyamenzela amhlophe ngokunqoba kwakhe uHadadezeri empini, owayesilwa impi loTowu. UJoramu wamlethela izitsha zesiliva lezegolide kanye lezethusi.

11 Inkosi uDavida yazinikela izitsha lezi kuJehova njengalokhu ayekwenze ngesiliva legolide okwavela kuzo zonke izizwe ayezehlule: 12 I-Edomi leMowabi, ama-Amoni lamaFilisti kanye lama-Amaleki. Wanikela lempango eyathathwa kuHadadezeri indodana kaRehobi, inkosi yaseZobha.

13 UDavida waba lodumo emva kokubuya kwakhe evelaqothula ama-Edomi ayizinkulungwane ezilitshumi lesificamibili eSigodini seTshwayi.

14 Wabeka izinkamba zamabutho okulinda kulo lonke elase-Edomi, njalo wonke ama-Edomi abuswa nguDavida. UJehova wamnika

ukunqoba uDavida loba kungaphi lapho aya khona.

Izikhulu zikaDavida

15 UDavida walibusa lonke elako-Israyeli, esenza okwakulungile lokuqondileyo ebantwini bakhe bonke. 16 UJowabi indodana kaZeruyiya wayephethe ibutho; uJehoshafathi indodana ka-Ahiludi wayengumabhalane; 17 uZadokhi indodana ka-Ahithubi lo-Ahimeleki indodana ka-Abhiyathari babengabaphristi; uSerayiya wayengumabhalane; 18 uBhanayiya indodana kaJehoyada wayephethe amaKherethi lamaPhelethi; amadodana kaDavida ayengabacebisi benkosi.